Revelation of John 18
Tuala Tatila ne Vaviloni Mimamulo
1Ioxe eni emaisou mimii ne mukalu xe ili'i no anu la angelo vile molu teitexi no loxotolo mulu'e. Anu xaviinu manina xe mulu'e la lamanaxu muieisou lia 'o mukalusi. 2 aAnu mu'ava tatila aloxo,“Tuala tatila ne Vaviloni a mimamulo mukalu.
Mo ane ixali tualasi'a ta uleenu ta masumasua.
Ane'i ta molosila mo ta ngiala ta masumasua
ilo'a ta ngiala ta la'ila'ia manina ixolu no anu.
3Xo ta mitema tavu'alo milai noxie la ilo'a mi'oxonu 'ili'ilixo masumasua sou vote'i,
la mi'oxone'i mixovulaulau loxo milosi'a uaini noxie la miiexu.
Mo ta tatanaanu no lia 'o mi'oxonu 'ilixo sou vote'i ne kalumo noxie.
Mo ta mitema sou isovanu mimii iouiou
la ta mitema ilotonu no lia 'o mino'u lamoli toxotoxoxa'a manina
no anu 'ili'ilixo masumasua noxie ne.”
4 bMo eni elomu la, la elomusou 'ava vile la molu teitexi no loxotolo mulu'e aloxo 'o,
“Ta mitema noxilo ngongi'a ngavaitami malaxo no anu susu noxie mamu,
nga'ume mo ngaxexesie mo sou umomomo sou
nga'una no anu tu'utu'umaxu e sou uxali noxie uasi.
5 cXo Lataua uxavutalanu 'ili'ilixo masumasua e ane mi'oxo'oxonu ne
misu'anu la'oluxu xo mole mutelo muxali teitexi no loxotolo.
6 dLa sou 'ili'ilixo ma'ia ane mi'oxonu mune'e noxinge
la ngakolinu ulivu noxie aloxo ne alaxu ta tamei.
Mo milosinge uaini ngeiexu la ngakolinu ulivu ulai noxie,
aloxo ne alaxu ta tamei xe ukalu la ngalosie iiexu.
7 eMo ngalosie navunavu manina mo itama,
xo ane i'itinu ualasie la mivikala lexe ane mixolu laixe manina.
Mo tane uvikala lexe ane mixolu loxo sema tatila la i'itinu ualasie mo ivikala lexe,
‘Eni loxo sema valu uasi xe umomomo sou mii vile u'oxoleli atama uasi.’
8 fAloxo ne la sou tu'utu'umaxu masumasua uxali noxie no voxo vilesisi.
Tu'utu'umaxu ne soli mo tama xe kaetoto toxoxa'a
mo ane i'ela no navu xo Tila anu Lataua xaviinu musuku
mulavusou 'ili'ilixo ma'ia ane mi'oxonu la muvikala lexe anu ukalusie.
9 gMo ta tatanaanu tuatuala e mine'e ilo'a mi'oxo'oxonu 'ili'ilixo iouiou sou vote'i la ilo'a mixolu laixe manina imaisou navu umuxu sou i'ela la itama mo ielielisie. 10Mo imaisou navunavu e muxali noxie ne la i'ume xe itulu va'axu 'olesi ia itama. Ane'i itama la ivikala lexe,
‘Maulamenge Vaviloni,
nini tuala manina mo xavineni musuku,
ia alaxu vilesisi la nini nakalu avile.’
11 hMo ta mitema sou isovanu mimii no lia 'o ukalusi kalumo itama mo ielielisie xo evile umomomo sou ulotonu mi'ami'a ilou mixamixa'a la uasi. 12 iMi'ami'a ilou mixamixa'a loxo xoulu mo siliva mo xapoxapo mo lasala mo lavalava keakea mo malivololoonu mo xalexalexu xe lauolauoinu, mo ovuovu tuma'u lailaixe mo mimii iouiou mi'oxonu no anu elepani anaxu mo ovuovu iouiou ilotonu la lamoli sou toxoxa'a mo balasi mo aeni mo kulu lailaixe toxoxa'a. 13Mo mimii tuma'u lailaixe loxo maiau sosou mo misou ielaxu la tuma'u lailaixe mo ueli mo mii tuma'u lailaixe mo uaini ilou olivu lexaxu mo palaua mo uiti mo kau mo sipsip mo oosi mo mii e oosi ulapulapunu sou utavulene'i ta mitema no anu mo isovane'i ta mitema sou ta mitema ilotone'i xe ta mitema imaumauli ne evile ulotonu la uasi.
14Ta mitema lavuluti la ivikala lexe, mimii e ngiangiaxu nini nemasaxau sou na'ou mo lavuluti iouiou mo tokolomo e lailaixe lamoli sou toxotoxoxa'a ne ukalu avile. La umomomo sou naxalisou la uasi. 15 jLa ta mitema sou isovanu mimii ne misovanu mimii no nano noxie la mino'u lamoli toxoxa'a ne mimaisou navunavu noxie ne la mi'ume manina la umomomo sou ilai 'alai uasi. Mitulu va'axusi. Ane'i mitama mo mielieli manina, 16 kmo mitama mi'ava'ava aloxo 'o,
‘Maulamenge tuala tatila manina,
tatei la tokolomoxe ne lavulavu keakea mo lailaixe manina
mo kaukavuxu iouiou manina.
Anu kaukavuxu malivololoonu mo lauolauoinu mo lasala
mo xoulu xe xapo iouiou ulamilami no anu vasimele.
17 lXo alaxu vilesisi la tokolomoie ilou lamolie ne tasiauxu.’
La ta mitema e itatavulenu lasipi tavu'alo mo ane'i e iaveiave no lasipi ilai no tuala xalexalee mose'i ne mo ane'i ane ixaxai no nano no lasipi mo ane'i ane maulixa'a muxolu no luaki ne itulu va'axusi la ie'i ukaasi. 18 mAne'i itulu ia ie'i ulai no navu umuxu e u'ie ukalu la i'ava ulai lexe, ‘Tuala tatila vile umomomo aloxo tuala tatila ane 'o uasi manina.’ 19La sou ane'i mi'uloxu lomulo no kisi'a xe mitama mo mielieli manina la mi'ava aloxo 'o,
‘Maulamenge tuala tatila manina,
no mine nexolu la ta mousou lasipi no luaki mixali
ta mitema sou lavuluti no anu lamoli noxiesi.
Ia alaxu vilesisi la ane tasiauxe avile.’
20 nAloxo ne la sou nini loxotolo mo ta mitema noxou Lataua
mo ta mitema sou xaixai noxou xe ta mitema sou palomatana.
Nga'osa manina xo Lataua mukolinu
la mulosie navunavu iouvilesisi aloxo ane mi'oxonu mune'e nixinge.”
21 oXe vaivaikala ne mukalu la emaisou angelo vile xaviinu musuku mu'itinu lavo'o kulu vile toxoxa'a la muleanu mulai no luaki. La mu'ava aloxo 'o,
“Tuala tatila ne Vaviloni ne ileanu ulai no luaki aloxo ne
mo umomomo sou ixalisou la uasi.
22 pMo umomomo sou ilomusou susapu mo vei
xe xoolau ta mitema i'oxonu utama no nano ne la uasi,
mo ta mitema sou xaixai iouiou umomomo sou ixaxai no nano ne la uasi,
xe umomomo sou ilomusou lavo'o sou uxiunu uiti luuxu la uasi.
23 qMo telu ukakaa no nano ne la uasi,
mo umomomo sou vaivaikala sou taula'i ilomusou no nano ne la uasi.
Ta mitema sou isovanu mimii mixali ta mitema sou lavuluti
mo xavine'i no ie'i ta mitema no lia 'o mukalusi.
Xo no anu saa kalakalavoi noxine la ne'oxone'i ta mitema
no xalexalee tuatuala no lia 'o milai va'axu mukalusi.
24 rXe no nano la ta mitema sou palomatana ilo'a ta mitema noxou Lataua
xe ane'i ane mive'a misoisoli sialuxa'a munixi,
la sou Lataua mumaisou aloxo ne la mukalusie tuala tatila ne avile.”
Copyright information for
ATA